قرقوش/ د. ماهر حبيب

أخيرا وجدنا الحل فى إنقاذ اللحلوح المصرى إللى بيطلع فى الروح وأعطيناه قبلة الحياة بتوجيه ضربة قاضية للدولار الأخضر وطبعا ده حا يوقف تدهور اللحلوح ويمكن يبقى اللحلوح بعشرة دولار فقد وجدنا الحل وما أعرفش كانت تايهة عننا إزاى وخبطتين تلاتة زى كده أمريكا حا تركع وتبوس إيدينا إننا ما نعملش كده تانى لأن بضاعتهم بارت وسوقهم وقف ومش عارفين يعملوا أيه فى الحوسة إللى حطيناهم فيها.

وعلشان ما أطولش عليكم فخبطة المعلم هى إن المحكمة قررت توقف خدمة اليوتيوب فى مصر لمدة شهر عقابا ليها على إذاعة الفيلم إللى هولا هو فيلم ولا غيره وطبعا كده الراجل صاحب اليوتيوب حا يفلس وسوقه حا يبور ومش عارف يعمل أيه وعمال يبعت فى وسطاء علشان لو إتطبق القرار ده حا يضطر إنه يقفل اليوتيوب وحا يعمله حصالة ومش عارف حا يودى الفيديوهات إللى عنده فين وطبعا أسهمه فى البورصة حاتنهار والسهم اليوتيوبى حا يندفع له فلوس علشان الناس تاخده وبرضه ما حدش حا ياخده مادام مصر قافلة التيوب ومش عارفين ممكن يحصل أيه.

وأنا شايف إننا كمان نقفل الفيس بوك لأن الفيلم بيتحمل عليه وممكن يتشير منه وكمان التويتر لنفس السبب وأهى نضرب عصفورين بحجر أهو نخلص من تشيير الفيديو وكمان تويترات البرادعى ونخلى بس تويتر مرسى بس هو إللى شغال أهو يتمنى التوفيق للضحايا زى ما بيعمل وفى أحسن الأحوال يبعت بتعزياته على التويتر بدل ما يعمل نعى للشعب المصرى فى صفحة وفيات الأهرام.

طبعا قرارات غريبة وقضايا أغرب من الخيال وناس فاضية ومحدش بيدور على مصلحة البلد وأهو محامين يشتغلوا ونيابة تحقق وقاضى يحكم وبعدين نستأنف ومحامى يترافع ونيابة تعيد التحقيق وقاضى يحكم وبعدين نوصل للنقض ومحامى يترافع ونيابة تتهم المتهم وقاضى يحكم بإلغاء كل الأحكام السابقة لأنه حكم أصابه العوار وأدينا قاعدين نتسلى زى مبارك ما قال وأما الشغل فده حاجة وحشة وهما إللى إشتغلوا خدوا أيه غير وجع القلب وخلينا ندور فى القنوات على إللى عاوز راجل على إللى عاوز يقتل الناس على إللى زهقان من العيش والعيشة وإللى عايشينها.

لو قفلنا اليوتيوب مين المستفيد ولو قفلنا الفيس بوك مين الخسران ولو حاربنا طواحين الهوا مين إللى حا يكسب وبنقول للوزير إللى مستنى مسودة الحكم كل إللى حا تعمله إنك حا تتعب الشباب شوية علشان يتخطى الحظر وحا يبقى الحظر بتاعك شبه حظر التجول بتاع مرسى إللى الناس خرجت مخصوص علشان تبل الحظر وتشرب ميته وبالظبط حا يروح تعبك ع الفاضى تمام زى ما كنتوا ناويين تلغوا المواقع الإباحية ولو إنكم رجعتوا فى كلامكم لأنكم لقيتوا إن أول قنوات حا تمنعها الفلاتر بتاعتكم هى القنوات الفضائية بتاعت هاتوا لى راجل وأخواتها إللى عماله تبعت لنا فيديوهات عجيبة وأبيحة لمن يهوى الإثارة والكلام الفارغ فإرحمونا من القرارات إللى بتشبه قرارات منع أكل  الملوخية بتاعت الحاكم بأمر الله أو إننا نخترع لنا برنامج أحكام قراقوش جديد علشان ننافس بيه برنامج البرنامج