مرسى : مين أشتون؟؟؟
أشتون : مرسى إزايك يا مرسى
مرسى : الشرعية
أشتون: أيه
مرسى : الشرعية
أشتون : أنا جايه أحل المشكلة ونتفاوض
مرسى: الشرعية
أشتون : خلينا نتكلم فى حاجة مفيدة تحل المصيبة إللى إنت عملتها
مرسى : الشرعية
أشتون : أنا ماشيه خلاص
مرسى لا أنا عاوز حاجة تانية
أشتون : قول
مرسى: التليفون
أشتون : ايه
مرسى : التليفون
أشتون : تليفون أيه الخيبة دى
مرسى : ده أنا مصدقت إنك جيتى أكيد معاكى تليفون مشحون وفيه خط
أشتون : طب عاوزه ليه؟
مرسى: أولا أكلم المرشد علشان أعرف ارد عليكى كويس وبعدين أكلم حسين
أشتون : هى مكالمة واحدة بس أنا مش شغاله فى سنترال
مرسى : طب ماشى هاتى التليفون .....ألو ألو رد على يا حسين
أوباما : ايوه يا أشتون خرجتى مرسى والا لا؟
مرسى : أنا مرسى يا حسين إلحقنى أنا لسه محبوس وإنت كنت مفهمنى إنى مهما عملت إنت حا تقف معايا علشان نكمل الخطة .... إلحقنى يا حسين إلحق أمن إسرائيل إلحق سينا حا ينضفوها ومش حا تعرف تنفذ حاجة إلحقنى وإلحق الجماعة ما تخلاش بينا يا حبيبى يا حسين
أوباما : إهدى يا مرسى إنت علقت تليفون اشتون والا أيه ؟ ما تخافش أنا ما خنتكش لغاية دلوقت إنت شوفت لما حبيت أجيبك رئيس عملت أيه فى مبارك أهو مسجون ومفيش حد عبره ولا حد زاره وإنت يا مرسى الدنيا مقلوبه عليك .. بس أنا عاوز اصارحك اوعى تكون فاهم إنك ريس بجد.
مرسى : ليه كده بس يا سحس هو أنا زعلتك فى حاجة
أوباما : بس علشان أنا مفروس منك بوظت لنا الطبخة ولو كنت فتحت مخك شوية كنت مشيت حالك وعملت شوية حركات على بقين حمضانين تنوم بيها الناس وكنت فرملت أخونة الدولة شوية لكن إنت إتسربعت وياما حاولت أكلمك ع التليفون الصغير إللى فضحتنا بيه وما كنتش بترد وكنت عاوز أنصحك علشان تلعبها صح
مرسى: معلش يا سحس التليفون كان بيبقى فاصل شحن أو الكارت عاوز شحن وكنت بأبعت لك رسالة سلفنى شكرا وبرضه مكنتش بترد على
أوباما يعنى بوظت الدنيا علشان تليفونك فاصل شحن روح يا شيخ منك لله
مرسى : طب وبعدين يا سحس
أوباما : ما تخافش أنا منعت الطيارات الجديدة عن الجيش المصرى وبعت لك ماكين وحا يقول بوقين حمضانين يوصف الثورة بالإنقلاب
مرسى: يعنى إنتى مالى أيدك من ماكين ده لو مشى من غير ما يخرجنى حا أروح فى الكازوزة أنا عاوز أخرج وحشنى الميكرفون وحشنى الجرايد وكل التليفزيونات بتجيب صورى وحشنى قصر الإتحادية والعيال إللى رجعوا يعيشوا فى التجمع بعد ما كانوا طايحين فى القصور ياكلوا كشرى فى العلب وكباب أبو شقرا ليل ونهار
أوباما :هو ده إللى هامك
مرسى إلحقنى يا حسين ...يا حسين إلحقنى ... إنت ما بتردش على ليه ...حسين يا حسين
أشتون: التليفون فصل شحن معلش فرصتك راحت أنا ماشية بقى إنت ما تنفعش تبقى رئيس ولا حتى غفير
مرسى : أنا فى عرضك يا ست أشتون إوعى تجيبى سيرة التليفون ده خرجونى من السجن إلحقونى أنا ما يهمنيش مصر ولا غيره أنا تحت أمركم خرجونى من هنا وحا تلاقونى خاتم فى صباعكم خرجونى وأحلامكم أوامر خرجونى وأنا أخلى مصر زى جمهورية الموز ما تعملش حاجة غير أوامركم خرجونى علشان أعزل السيسي بدل ما يطلع لكم عبد الناصر جديد يوجع قلبكم ودماغكم خرجونى وأنا حا أحل قضية فلسطين على حساب سينا خرجونى علشان أسلم حلايب وشلاتين للبشير خرجونى علشان أغرق مصر فى الديون والضلمة علشان تبقى تحت أمركم خرجونى علشان أروح افتتح سد النهضة خرجونى علشان أكمل الهلال السنى إللى حا يحارب الهلال الشيعى ويحول المنطقة لساحة حرب ويجيب عاليها واطيها خرجونى علشان أفكك الجيش المصرى مش على الطريقة السورية لكن على الطريقة الإخوانية بزرع الإخوان فى الجيش ويبقى سٌوسه منه فيه ...خرجونى
اشتون: ده إنت زبون لقطة بس المشكلة إن الشارع المصرى مش طايق يسمع سيرتك
مرسى : الشرعية
أشتون : أيه؟
مرسى الشرعية
أشتون: تانى
مرسى : أصل أنا عندى شعرة إسمها الشرعية ساعة تروح وساعة تييجى ساعة تروح وساعة تييجى .....هيه راحت خلاص
0 comments:
إرسال تعليق