يا   اهل الخير معدومه الحراره

وما عنا مين يفهم بالاشاره
اذا البرّي ما بدّو يصير جوّي
بكل مجال رح تمشي الخساره

وطننا بيصرخ همومي عْلُوّي
وما بقدر شن عا الاخات غاره
عا ها المودال ما بدّي اخوّي
صرت عا الارض من عينين جاره

ما جانا حل من دار الفتـّوه
ومن الديمان ما جات البشاره
وما بين المشكله والحل هوّه
ولرفع المستوى نحنا غيارى

ضروري نخلق من الضعف قوّه
وضروري يكون في عنا اداره
اذا بها الظرف منقلل مروّه
علينا بيضحكو طفال الحجاره

صارو كتار ارباب النبّوه
وبطول الدقن عم تقوى التجاره
الخلقنا مش لناس وناس هوي
تعو نعمل حزب الله المسيحي
ما بدنا الرب يغضب عا النصارى

استيفانوس استيفانوس

**

معارضة الشاعر عصام ملكي

يا رب الكون عن شعبك تخلـّى
لأنو المستوى عندو حا يلله
وعا راس السطح بيقول المنادي
زمام الامر بجهنم تولـّى

هيدا دقن طوّل والايادي
رجمت بير منو الشعب ملـّى
وهيدا واعظ لاجل السياده
وعا عين الناس بالتمثيل صلـّى

"استيفانوس" بعرفك انسان هادي
عدّو التفرقه عليك السملله
ببحر الشعر حرفك "سندبادي"
عا وين الزخم بالموجات دلـّى

"بحزب الله مسيحي" عم تنادي
عا خشبة منبر وصوتك معلـّى
كأنو الرب عاطيك الشهاده
وبسكـّر قلك كلامك محلـّى

التجاره باسم الله متل عاده
عم بتصير والواقع تجلـّى
الله دخل اسمو للعباده
والله للحنان  وللمحبه
ما بدّو عا الارض "احزاب الله"
**

قسْطنطين سابـــا المجد برْكابو

للربّ بسّ بيطعجو رْكــــــــابو

بصفحة حياتو مسجَّـل عْناويـن

وعالآدميّه كــــاتــــــب كتابــو.

الصحبِه قديمه بعرفو من سنين

صاحب قلم وكــتــــــار أحبابـو

وقلبو متل تــلـــج العَلى صنّين

ومــا ضيّعو الأوزان أعصابو.

إنسان كامل عن جداره، ومِين

مـــــــا قال إنّو الذوق عِرّابو؟

العيلِه قطْر مش يمكن وتخمين

وصِيت الحلو معروف أسبابو.

كلّو محبِّه وعاطـفِـه قسطنطين

وللعاوزينو مشرّع بـــــوابــــو

ومعلوم بيعدّ الصداقــــــه دِين

وشربل بعيني قبْل منّي قـــال:

إلنا الشرف تـا نْكون أصْحابو

يا مغترب لبنان وديلو

دقة قلب من هون تشكيلو

جنه لأنو والعيار تقيل

بالنا من الراس فينا نشيل

ومن بالنا ما منقدر نشيلو

منقول بالغربه بفرد لسان

قد الدني بعيوننا لبنان

حنا اخونا وخينا محمود

منحب عا ارضو المحبه تسود

وما يكون عنا تفرقة اديان

لبنان هيكي من قبل ما كان

وبالرغم من هيدا انا انسان

بعيد الوطن ما بغير العاده

بحيي السفير وقنصل بلادي

وحضرة رئيس بلادنا سليمان

اليوم الوطن واقف عا خط النار

ومن ها التعصب لاحقو اضرار

بعيد استقلالنا السبعين

شدو الهمم تا نكون متحدين

العيشه طريق وعمرنا مشوار

نحنا وطن للكل سميناه

ما كان هيكي وقت ما ورتناه

مشوّه ما بدنا بالدني نخلـّيه

لولادنا مفروض تا نعطيه

بالشكل ذاتو متل ما خدناه

كتابك يا سركيس العصامي شفت

وخدتو معي وبالليل ساهرتو

وطعمة شو هوّي بالحياة عرفت

لما بعيوني كتير سايرتو

قلت لبطل لبنان لما وقفت

من كم سنه قدّام مقبرتو

لو كنت حي بها الزمان قرفت

والموت كنت لحالك اخترتو

الشاعر عصام ملكي في قصيدته هذه يعارض نصف القصيدة التي ألقاها الشاعر طليع حمدان يوم إزاحة الستار عن تمثال الشاعر المرحوم إدوار حرب، وعندما سألناه لماذا لم يعارض القصيدة كاملة أجاب شعرياً:

عا الكنفشه أيّوب متلي ما صبر

وجهة نظر منشان أعطي منجبر

نص القصيده معارض.. وعارف أنا

العالم بيشوفو المبتدا تارك خبر

ولأن "المبتدأ" قد ترك "خبره" في خبر كان، نترككم مع المقاطع التي عارضها:

قال الشاعر طليع حمدان: